બગીચામાં અપરાધ ***મહેન્દ્ર જોષી

ગુલાબનું અંગારા થવું 

એ એક અપરાધ છે 

ગુલાબનું કોઈને ખોબામાં ધરવું 

એ બીજો અપરાધ છે 

ખોબાને સદંતર ભૂલી જવો 

એ વળી ત્રીજો ...

સાંજનું ધીરે ધીરે પડવું 

એ એક અપરાધ છે 

સાંજનું ખાલીખમ્મ બગીચામાં પડવું 

એ બીજો અપરાધ છે 

બગીચામાં એકલવાયા બાકડાનું 

એકલું પડવું એ વળી ત્રીજો ...

આંસુઓ વારે વારે આવી જવા 

એ એક અપરાધ છે 

આંસુઓ પોતાની જ આંગળીઓથી લૂછવા 

એ બીજો અપરાધ છે 

પાસે કોઈનો નામગૂંથ્યો રૂમાલ ન હોવો 

એ વળી ત્રીજો .....

પણ 

કોઈને હમણા જ આવું છું કહીને 

ક્યારેય ન આવવું 

એ સૌથી મોટો અપરાધ છે 

આ જગતમાં 

અપરાધ તો ઘણા છે .......મહેન્દ્ર જોષી (કવિતા દ્વિમાસિક અંક જુન ૨૦૧૩ )