એક ગઝલ ***સરનામે ***મહેન્દ્ર જોષી

એક ગેરસમજણ છે બંધ દ્વાર-દરવાજે
રોજ રોજ જીવે છે કોઈ એમ ભણકારે

તેં બધા જ પગલાઓ ભૂંસી એમ નાખ્યા છે
આવનાર આવે , તો આવે ક્યાં એ સરનામે ?

સર્વ કોઈ જાણે છે ,એક હું  જ વણજાણ્યો
કૂજતી રહી કોયલ કેમ ઘર પછવાડે!

સાત રંગ લઈને મેં માંડ દ્રશ્ય સર્જેલું
જાગતા જ રેલાયું ,વિશ્વ એક પલકારે

ના ,વચન મેં કોઈને , કોઈ વાર દીધા છે
તો ય મારે હિસ્સે છે અંત ભાગ વનવાસે

સાવ જીર્ણ વસ્ત્રોમાં સાવ નગ્ન ચરણો લઇ
નીકળી પડ્યો ઘરથી કેમ આમ રઘવાટે !

એક માત્ર ઘટના છે જન્મભરની જોશીમાં
સૂર્ય સૂતો જોયેલો ,વૃક્ષના જ પડછાયે ....

૦૯-૧૨-૨૦૧૩ ...